හම්බන්තොට වරායට නැව් 3කින් ගෙන ආ වාහන 1700ක් පමණ තිබෙන බව ත් අද සහ නිවාඩු දිනයක් වන හෙට දිනය ඇතුළත වැඩකර එම වාහන ඉතා කඩිනමින් නිෂ්කාශනය කිරීමට කටයුතු කරන බව ශ්‍රී ලංකා රේගු මාධ්‍ය ප්‍රකාශක සීවලී අරුක්ගොඩ පැවසීය.
වාහන ආනයන සඳහා ආනයන හා අපනයන රෙගුලාසි සංශෝධන සහිතව මුදල් සැලසුම් සහ ආර්ථික සංවර්ධන අමාත්‍ය ලෙස ජනාධිපති අනුර කුමාර දිසානායක පෙරේදා (මාර්තු 19) ගැසට් නිවේදනයක් නිකුත් කළ අතර ඒ ඔස්සේ වාහන කඩිනමින් හා පහසුවෙන් නිදහස් කර ගැනීමට ආනයනකරුවන්ට හැකිවනු ඇති බව රේගු මාධ්‍ය ප්‍රකාශකවරයා කීවේය.
වාහන සහිතව ශ්‍රී ලංකාවට ආ පළමු නැවේ වාහන 197ක් සඳහා බියුරෝ වෙරිටාස් නමැති ජාත්‍යන්තර සමාගමෙන් නැව්ගත කිරීමට පෙර වාහනවලට කරන සහතිකකරණය සිදුකර තිබූ අතර මීට පෙර ජනවාරි මාසයේ 31 වන දා නිකුත් කළ ගැසට් නිවේදනයට අනුව ජපන් වාහනවලට එම සමාගමේ සහතිකය අදාළ කරගැනීමේ ගැටලුවක් තිබිණි.
බියුරෝ වෙරිටාස් නැමැති සමාගමට ජපානයෙන් අපනයන කරන වාහනවලට නැව්ගත කිරීමට පෙර පරීක්ෂණ සහතිකය නිකුත් කිරීමට නොහැකි බවට මීට පෙර නිකුත් කළ ගැසට් නිවේදනය අනුව අර්ථකථනය කිරීමට හා තර්ක කිරීමට ඉඩ තිබූ බව ත් එහිදී ආනයනකරුවන්ට වාහන නිදහස් කරගත්තත් පසුව ගැටලු මතුවීමට හැකියාව තිබූ බව ත් රේගු ප්‍රකාශකවරයා පැවසීය.
ඒ අනුව, එම බියුරෝ වෙරිටාස් සමාගමෙන් සහතික ලබාගත් ජපන් වාහන 197ක් හම්බන්තොට වරායෙන් නිදහස් කරගැනීමේ ගැටලුවක් මතුවී තිබූ බැවින් එය විසඳාගැනීමට නව ගැසට්ටුවක් නිකුත් කරන්නැයි ශ්‍රී ලංකා රේගුව මුදල් සැලසුම් සහ ආර්ථික සංවර්ධන අමාත්‍යාංශයට පැහැදිලි කර දැනුම් දී තිබේ.
Published in Uncategorized
