2023 නව වසර උදාවී ඇත්තේ සැම සිත් මත අලුත් බලාපොරොත්තු ඇති කරමිනි. 2022 වසරේදී ඉටුකර ගත නොහැකි වූ අභිමතාර්ථ නව වසරේදීවත් ඉටු කර ගත හැකි ද යන්න බොහෝ දෙනකුගේ සිත තුළ ඇති පැතුමයි. ඒ ප්‍රාර්ථනා බොහෝදුරට ඉටු කර ගැනීමට හැකියාව පවතින සූර්යග්‍රහණ දෙකක්, චන්ද්ර ග්‍රහන දෙකක් සහ ග්‍රහ යුද්ධ 11ක් මේ වසරේදී සිදු වේ. ඒවායින් වැඩි කොටසක ජයග්‍රහණ ලබන්නේ බුධ ග්‍රහයා වීම විශේෂත්වයකි. ඊට අමතරව දීර්ඝ කාලීනව රාශිවල ගෝචර වන ශනි, ගුරු, රාහු, කේතු යන ග්‍රහයන්ගේ රාශි මාරු ද පවතී. ඒ අනුව 2023 වසර දේශගුණික, කාලගුණික සහ සාමාජයීය විපර්යාස රැසක් ද සිදුවිය හැකි වසරකි.
ලග්නය අනුව 2023 වසර ඔබට කෙසේ දැයි අපි විමසා බලමු.
ලග්න දොළොසින් උපන් සැමටට නව වසර සුබපල ගෙනේවා
ඉෂ්ට දෙවියන් බෙලෙන් යන එන සියලු තැන්හිම ඔබ රැකේවා
කුම්භ ලග්නය අනුව සිරිලක පුරා සැමදා සෞභාග්‍යය රැඳේවා
වික්ම සවිබල ලැබී ලෝ සත මෙත් සිසිල් ගුණයෙන් නිවේවා!
ලග්න කීපයකටම සස යෝගය, බුධ ආදිත්‍ය යෝගය, ගුරු හංස යෝගය, මයුරපාල යෝගය, මාලවි යෝගය යෙදීමෙන් සුබ ප්‍රතිඵල රැසක්
සූර්යග්‍රහණ දෙකක්, චන්ද්ර ග්‍රහණ දෙකක් සහ ග්‍රහ යුද්ධ 11ක් සිදුවීමට ඇති බැවින් බොහෝ පැතුම් ඉටු වන වසරකි
මේෂ – ඉතා යහපත් වූ වසරකි
•ගෘහ ජීවිතය:- මෙතෙක් ඔබේ ජීවිතයේ ඉටු නොවූ බලාපොරොත්තු රැසක් මේ වසර තුළ සම්පූර්ණ කර ගැනීමට හැකිවේ. ගේ දොර ඉඩකඩම්, යාන වාහන, සිහින සැබෑ කර ගැනීමටත් විවාහ ප්‍රමාද වූවන්ගේ සහ දරුඵල අපේක්ෂා කරන අයගේ පැතුම් ඉටුකර ගැනීමටත් හැකිවේ. උත්සාහයෙන් කටයුතු කරන්න. වචනය පරෙස්සමෙන් පරිහරණය කරන්න. යුගදිවිය අවබෝධයෙන් ගෙවන්න.
•රැකියාව :- මෙතෙක් කලක් ඔබ රැකියාවක් සොයමින් සිටියේ නම් සහ ඔබේ රැකියාව අහිමි වී තිබුණේ නම් ඔබට සුදුසු රැකියාව ලැබීමේ භාග්‍යය පවතී. බොහෝ දුරට ජනතා සුබ සිද්ධිය සඳහා කටයුතු සිදු කරන තමන්ට කුසල කර්මයන් ද සිදු කරගත හැකි රැකියාවකට අවතීර්ණ වීමේ ග්‍රහබල පෙන්වයි. විසිතුරු භාණ්ඩ, රත්රන්, සුවඳ විලවුන්, ඇඳුම්, සුඛෝපභෝගී භාණ්ඩ අලෙවියට සුබයි.
•අධ්‍යාපනය :- සියලුම අංශවල අධ්‍යාපන කටයුතු ඉතා හොඳින් කර ගැනීමට හැකි ශක්තිය, ධෛර්ය ඔබ සතුය. විදෙස් අධ්‍යාපනයට යෑමට අපේක්ෂා කරන අයට ද අරමුණු ඉටුකර ගත හැකි අතර, තරග විභාග, සම්මුඛ පරීක්ෂණ ආදියෙන් ජයග්‍රහණ ලබයි. උසස් පෙළ විභාගයට සූදානම් දරුවනට සුබපල ලැබීමේ වාසනාව ඇත.
•සෞඛ්‍යය :- සෙම් රෝග, ස්නායු ආබාධවලට මුහුණ දීමට සිදු වුවත් ඇතැම් විට කලක පටන් තිබූ අසනීපයක් සුව වීමට ද ඉඩ ඇත. පවත්නා අපල තත්වයන්ගෙන් සහනයක් ලැබීමට වැටකෙයියා මල්, රතු නෙළුම් පූජා කර අඟහරුවාදා දින නිර්මාංශව බෝධිපූජා තැබීම සුදුසුයි. බ්‍රහස්පතින්දා දින බෝමළුව ඇමදීම සුදුසු වන අතර, දානමාන පින්කම්හි නිරත වන්න. පිරිත් ශ්‍රවණය කරන්න.
• අය 11, වැය 5, සුබ අංක 4, 5, 7, 9
සුබ වර්ණ – රතු, නිල්, සුබ දවස් – ඉරිදා, අඟහරුවාදා
වෘෂභ – විදෙස් ගමන් සඵල වෙයි
•ගෘහ ජීවිතය :- කුජ ලග්නගතව සිටියත් ලග්නාධිපති සිකුරු පුණ්‍යස්ථානයේ සිට ලග්නය දැකීම සුබදායකය. පිහිටා ඇති ග්‍රහ රටාවන් අනුව මුදල් අඟහිඟකම්වලට මුහුණ දීමට සිදු නොවේ. ගුරු අයස්ථානයේ ගමන් කිරීම නිසා ලැබීම් සහිතය. යහපත් පෞරුෂයකින් කටයුතු කරයි. දැඩි මතදාරී බවක් පළ කෙරුණත් දියුණුව සලසා ගැනීමට උනන්දු වෙයි. අවිවේකය බලපවත්වයි. විවාහ කටයුතු සඵල වේ. නොකළ වැරදිවලට චෝදනා ලැබිය හැකි බැවින් කල්පනාවෙන් කටයුතු කරන්න.
•රැකියාව :- දැඩි උත්සාහයකින් කටයුතු කරන්නට සිදුවේ. බොහෝ අවස්ථාවල සමාජ සේවා, ගිලනුන්ට උපස්ථාන කිරීම් වැනි සේවාවල නිරත වන්නට ද සිදු විය හැකිය. නව රැකියා ලාභ හිමිවේ. තැන්පත් ධනයක් පවත්වා ගැනීමට හැකි අයුරින් උනන්දු වන්න. ඇතැම් විට ඔබේ යටතේ කිහිප දෙනකුට රැකියා අවස්ථා දීමට ද හැකියාව පවතී. රැකියාවට අමතරව නිෂ්ඵල ගමන් සහ වියදම් යෙදේ.
•අධ්‍යාපනය :- විදෙස් අධ්‍යාපනයට අවස්ථා උදාවේ. කලා අංශවල ඉගෙන ගන්නා දරුවන්ගේ හැකියාවන්ට ඉඩකඩ ලැබෙන අතර, ඔවුන් ඒ අංශවලින් විවිධ ජයග්‍රහණ ලබයි. අනෙකුත් අංශවලින් ඉගෙනගන්නා දරුවනට සුළු සුළු බාධා මතුවිය හැකි බැවින් චිත්ත ධෛර්යෙන් යුතුව කටයුතු කළ යුතුය. බදාදා දිනය බෝධි පූජාවලට යොමු වන්න.
•සෞඛ්‍යය :- චර්ම රෝග, ලේ දෝෂ, පාදවල වේදනා මතු විය හැකිය. අපල අනතුරු ඇති විය හැකි බැවින් ප්‍රවේශමෙන් වැඩ කටයුතු කරන්න. වාහන පැදවීමේදී කල්පනාකාරී වන්න. වසරේ අපල අඩු කර ගැනීමට සිකුරාදා දින නිර්මාංශ වන්න. සෙනසුරු යෝග කාරකයා බැවින් සෙනසුරු වෙනුවෙන් කරන ග්‍රහ පූජා වැඩි කරන්න. වැටකේ මල් පුදන්න. දහමට නැඹුරු වන්න.
• අය 8, වැය 5, සුබ අංකය – 6, සුබ වර්ණය – සුදු,
සුබ දවස් – බදාදා, සිකුරාදා, ඉරිදා
මිථුන – ලැබීම් රාශියක් සහිතයි
•ගෘහ ජීවිතය :- අෂ්ටම ඒරාෂ්ටක තත්ත්වය අවසන් වීම නිසා 2023 වර්ෂය ඔබට සුබදායකය. අතහැරදමා තිබූ වැඩ නැවත පටන් ගැනීමට හැකි අතර පවුලේ සමගිය වර්ධනය වේ. ගේ දොර, යාන වාහන, ඉඩකඩම් ලාභවලට හිමිකම් ඇත. විවාහ සහ දරුඵල අපේක්ෂා ඉටුවෙයි. උසස් උගත් අයගේ ඇසුර හිමි වන අතර, පුණ්‍ය කටයුතුවලට යොමු වෙයි. අනාගත දියුණුව සලසාගත හැකිය. කළමනාකාරිත්වයකින් යුතුව බුද්ධිමත් තීරණ ගෙන වැඩකටයුතු කරගෙන යන්න.
•රැකියාව :- මෙතෙක් ඔබට රැකියාවක් නොලැබ සිටියේ නම් මේ වසර තුළදී එය ඉටුවනු ඇත. බොහෝවිට පුණ්‍ය කටයුතුවලට නැඹුරු එකක් විය හැකිය.වැඳුම් පිදුම් ලබන සහ ගෞරවාන්විත රැකියාවලට ද යොමුවේ. නැතහොත් විදේශ රැකියා හිමිවේ. ව්‍යාපාර කටයුතු දියුණු කර ගැනීමට උනන්දු වන්න.
•අධ්‍යාපනය :- දුවා දරුවන්ගේ අධ්‍යාපන තත්ත්වය වැඩි දියුණු වේ. පොතපත, පරිගණක තාක්ෂණය මඟින් සිය දැනුම උකහාගෙන අපේක්ෂා මුදුන් පමුණුවා ගැනීමට අරමුණු කරා ළඟාවීමට හැකි වෙයි. දෙමාපිය ආරක්ෂාව සහ අවධානය පමණක් වැදගත් වේ.
•සෞඛ්‍යය :- පපුවේ අමාරු, සෙම් රෝග, හදිසි සුළු අනතුරු ආදිය සහ පාදවල වේදනා, ස්නායු දුබලතා ඇති විය හැකි බැවින් සැලකිලිමත් වන්න. අපල මඟහරවා ගැනීමට කොහොඹ පැළයක් මුල් සතියේම ගෙවත්තේ සිටුවා එයට සත්කාර කරන්න. කොහොඹ කොළ තැම්බූ වතුරෙන් මුහුණු අතපය සෝදන්න. බදාදා දින නිර්මාංශ වන්න. එම දිනයේ බෝධි පූජා තබා විෂ්ණු දෙවියන්ට පින් දෙන්න. ගිතෙල් ආදිය පූජා කරන්න.
• අය 10, වැය 8, සුබ වර්ණ – කොළ, කහ, සුබ දවස් – බදාදා, බ්‍රහස්පතින්දා, සිකුරාදා
කටක – ගෘහ ජීවිතය සතුටින් පිරෙයි
•ගෘහ ජීවිතය :- ඔබගේ යහපත් සිතුම් පැතුම් ඉටුකර ගැනීමට හැකියාව තිබෙන මේ වසර තුළ අෂ්ඨව ඒරාශ්ටක තත්වයක් ද ගොඩනැඟෙන බැවින් බොහෝ කල්පනාකාරීව සැලසුමක් ඇතිව වැඩකටයුතු කරන්න. වසර මුල සිටම ජීවනෝපාය කටයුතු උදෙසා බොහෝ ඇවිදිලි වැඩ යෙදෙයි. ගෘහ ජීවිතයේ සමගිය සමාදානය පවතී. සමහරවිට හැලහැප්පීම් මත ගැටුම් ඇති වුවත් ඒවායින් නොසැලී දිරිමත් වන්න. ඔබේ බලාපොරොත්තු අරමුණු කරා යෑමට හැකියාව ලැබේ. අධර්මයෙන් කල් ගෙවන අයට අපල උපද්‍රව වැඩිවිය හැකි බැවින් හැකිතාක් ධාර්මික වන්න.
•රැකියාව :- විදෙස් ගමන් බලාපොරොත්තුවෙන් සිටින අයගේ පැතුම් සඵල විය හැකි වසරකි. දැනට කරගෙන යන රැකී රක්ෂා වෙනුවෙන් වැඩිපුර ගමන් නිර්මාණය වේ. රැකියාවක් සොයමින් සිටි ඔබට රැකියා අවස්ථා හිමි විය හැකි වුවත් එහි අවිවේකී බව නිසා ඔබට කල්කිරීම් ඇති විය හැකිය. එහෙත් ඉවසීමෙන් කටයුතු කිරීමෙන් ජයග්‍රහණය ලබාගත හැකිය. අතමිට හිඟ නොවේ.
•අධ්‍යාපනය :- ප්‍රාථමික අධ්‍යාපනය ලබන දරුවන්ගේ දැනුම වර්ධනය වනු ඇත. දෙමාපිය කැපවීම මත දරුවාගේ දිරිමත් වීම පවතී. ඒරාෂ්ටක තත්ත්වය නිසා උසස් අධ්‍යාපනය ලබන දරුවනට බාධා මතු වුවද බ්‍රහස්පතින්දා දින බෝධි පූජා තබමින් ග්‍රහදොස් අපල දුරුකර ගත හැකිය. අරමුණු සඵල වේ. සෙනසුරාදා දිනය ද නිර්මාංශව ගතකරන්න.
•සෞඛ්‍යය :- ආමාශ සහ උදර රෝග, හෘද රෝග සහ විෂ ශරීරගතවීම් ඇතිවිය හැකි බැවින් සැලකිලිමත් වන්න.
අපල අඩු කර ගැනීමට සඳුදා දින නිර්මාංශ වී ආරම්භයේ පත්තිනි දේවාලයට කිරිබත් පූජාවක් දෙන්න. සෙනසුරාදා දින 21ක් බෝධිපූජා තබන්න. කරන්න. දිවුල් කිරි සහල් පාත්‍රාවක් දන් දෙන්න. පසළොස්වක පොහොය දින උපාසක අයට ගිලන්පස දෙන්න.
•අය 7, වැය 6, සුබ අංක 2, 7, 9, සුබ වර්ණය
සුදු, සුබ දවස් – සඳුදා, අඟහරුවාදා
සිංහ – රැකියා, ව්‍යාපාර දියුණුවෙන් දියුණුවට
•ගෘහ ජීවිතය :- ඔබට අතපසු වී තිබුණු වැඩකොටස් යළි නඟා සිටුවා ගැනීමට ශක්තිය ධෛර්ය ලැබේ. ගේදොර, යානවාහන ලාභ පවතී. නිවෙස් අලුත්වැඩියා කිරීම් සහ අලංකරණ කටයුතු සිදු කිරීමට අවස්ථාව සැලසේ. විදෙස් ගමන් යෙදේ. විවාහ සහ දරුපල ප්‍රමාද වූ අයට සුබපල ගෙනදෙන වසරකි. උත්සාහයෙන් කටයුතු කරන්න.
•රැකියාව :-කුජ 10 වැන්නේ දිග්බලව සිටීම යනු මේ වසර තුළ ඔබට තැන්පත් ධනයක් පවත්වා ගැනීමට හැකි අයුරින් රැකියා අංශවල දියුණුවක් දක්නට ලැබෙයි. අධ්‍යයන කටයුතු සඳහා ද සුබ වසරක් බැවින් පුහුණු කටයුත්තක් සඳහා යොමුවිය හැකිය.
•අධ්‍යාපනය :-දූ දරුවන්ගේ අධ්‍යාපන කටයුතුවලට සුළු සුළු බාධා දක්නට ලැබුණ ද ප්‍රාථමික අධ්‍යාපනය ලබන දරුවනට එසේ බාධා ඇති නොවේ. බෝධි පූජා පැවැත්වීමෙන් එම බාධා මඟ හරවා ගත හැකිය.
•සෞඛ්‍යය :- ස්නායු රෝග, අජීර්ණ තුන්දොස් කිපීම් ආදියට හේතු කාරණා යෙදෙන බැවින් සෞඛ්‍ය තත්ත්වය පිළිබඳ සැලකිලිමත් වන්න. අපල අඩු කර ගැනීමට වසරේ පළමු ඉරිදා දින නිර්මාංශව බෝධි පූජා තබන්න. රතු මල් පූජා කරන්න. අවසානයේ කතරගම දෙවියනට පින් දෙන්න. රෝගීන්ට අවශ්‍ය කරන බෙහෙත් ද්‍රව්‍යයක් පරිත්‍යාග කරන්න.
• අය 14, වැය 11, සුබ අංක 1, 4, සුබ වර්ණය – රතු, සුබ දවස් – ඉරිදා, අඟහරුවාදා, බදාදා, සිකුරාදා
කන්‍යා – ප්‍රීතිමත් ගෘහ ජීවිතයක සතුට
•ගෘහ ජීවිතය :- 2023 වසර ඔබට සුබපල ගෙන දෙන දෙන අතර, සමාජයෙහි ප්‍රසිද්ධ වීමට මෙන්ම අන්‍යයන් අතර ප්‍රියමනාප අයෙකු සේ කල්ගත කිරීමට ද වාසනාව ලැබේ. ගෘහ ජීවිතයේ සුවපහසුව වෙනුවෙන් අවශ්‍ය කරන බඩු භාණ්ඩ මිලට ගැනීමේ භාග්‍යය ද පවතින අතර, පදිංචි ස්ථානයේ දියුණුව පිණිස වෙහෙසෙයි. යුග ජීවිතය පවුලේ සියලු දෙනා සමඟ ප්‍රීතිමත් ලෙස ගත කිරීමේ හැකියාව ඇත.
•රැකියාව :- රැකියාවේ තනතුරු උසස් වීම්වලට හිමිකම් ඇත. මෙතෙක් රැකියාවක් නොලැබ සිටියේ නම් අලුත් රැකියා ලැබෙයි. එහෙත් වගකීම් නිසි ලෙස ඉටුකිරීම ඔබගේ ප්‍රධාන අරමුණ විය යුතුය. රාහු මහ දශා ගත කරන අයගේ රැකියා තත්ත්වය පවත්වාගෙන යෑමට අවහිරතා ගොඩනැඟෙන බැවින් බුද්ධිය මෙහෙයවා කටයුතු කරන්න. ලිපි ලේඛන සම්බන්ධ රැකියාවලින් ජයග්‍රහණ ගෙන දෙයි.
•අධ්‍යාපනය :-ඉගෙනුම් කටයුතුවල යෙදෙන සියලු දූ දරුවන්ගේ නැණ නුවණ වර්ධනය වන ග්‍රහබල ශක්තීන් පවතින හෙයින් බාධාවන් නොයෙදේ. ජයග්‍රහණම ලබයි. අලස ගති මතුවිය හැකි හෙයින් සෙනසුරාදා ඒ වෙනුවෙන් බෝධි පූජා තබා දරුවනට සෙත් පතන්න.
•සෞඛ්‍යය :- තදබල ලෙස අසනීප මතු නොවූවත් ස්නායු දුබලතා, අත්පා හිරිවැටීම්, ලේ දෝෂ ආදිය ඇති විය හැකිය. ගතකරනු ලබන දුර්වල දශාවන් හේතුවෙන් හදිසි අනතුරු ආදිය ද ඇතිවිය හැකිය. අපල අවම කර ගැනීමට කොහොඹ පැළයක් වර්ෂයේ මුලදී සිටුවා එයට සත්කාර කරන්න. කොහොඹ කොළ තම්බා ගත් වතුර ස්නානයට යොදා ගන්න. බදාදා දවස නිර්මාංශව බෝධි පූජා පවත්වා ප්‍රධාන වශයෙන් විෂ්ණු දෙවියන්ට පින් දෙන්න. අසරණ දරුවන්ට දැනුම සහ පොත්පත්, පාසල් උපකරණ හැකි පමණින් ලබා දෙන්න.
• අය 5, වැය 3, සුබ අංක 2, 3, 5, 7, සුබ වර්ණය – කොළ, සුබ දවස් – බදාදා, බ්‍රහස්පතින්දා, සිකුරාදා
තුලා – බලාපොරොත්තු ඉටුවෙන ජයග්‍රාහී වසරක්
•ගෘහ ජීවිතය :- මේ වසර තුළදී ඔබ විශේෂයෙන් දහමට නැඹුරුව කටයුතු කිරීමට සිතට ගැනීම වැදගත් වේ. ගේදොර දියුණුවට කරුණු සකසා ගැනීමට හැකි වුවත් කලකිරුණු ස්වභාවයක් පැවතීමට ද පුළුවන. යුග ජීවිතයේ යම් යම් අවස්ථාවල හැලහැප්පීම්, ගැටලු මතුවිය හැකි බැවින් වචන දුර දිග නොයවා ඉවසීම සහ බුද්ධිය පෙරදැරිව ඒවා විසඳාගත යුතුය. උත්සාහය, කැපවීම ඇතොත් ඔබට බොහෝ අතපසු වූ වැඩ කටයුතු පවා යළි නඟා සිටුවා අරමුණු කරා ළඟාවිය හැකිය. අනාගතය යහපත්ය.
•රැකියාව :- රැකියා සහ ව්‍යාපාර කටයුතුවලට මේ වසර සුබපල සහිතය. මෙතෙක් රැකියාවක් සොයමින් සිටි අයට පෞද්ගලික හෝ රජයේ රැකියා අවස්ථා හිමි වනු ඇත. රැකියා ස්ථාන හෝ ව්‍යාපාර කටයුතුවලදී වංචාකාර පුද්ගලයන්ට හසුවීමේ ප්‍රවණතාවක් ද ඇති බැවින් ඒ පිළිබඳ අවධානයෙන් කටයුතු කරන්න. මුදල් අතට ආවත් ඒවා ඉතිරි කර ගැනීමට ද බුද්ධිමත් වන්න. රැකියාව වෙනුවෙන් බොහෝ ඇවිදීමට ද සිදුවිය හැකිය.
•අධ්‍යාපනය :- ඉගෙනීමේ යෙදෙන සියලු අංශවල දුවා දරුවනට තම දුර්වලතා මඟහරවාගෙන මානසික ශක්තිය වැඩි දියුණු කරගෙන අධ්‍යාපන කටයුතුවල නිරත වීමට හැකියාව ලැබේ. අභියෝග ජය ගැනීමේ වාසනාව ඇත. ඉගෙනුමට දුර්වල ළමුන් සඳහා බදාදා දින බෝධි පූජා තබා සෙත් පතන්න.
•සෞඛ්‍යය :- උණ රෝග, හිසෙහි චර්මගති රෝග, වකුගඩු අසනීප, හදිසි අනතුරු, සතුන්ගෙන් හිරිහැර ඇතිවිය හැකි බැවින් කල්පනාකාරී වන්න.අපල දුරුකර ගැනීමට වර්ෂයේ මුල් සිකුරාදා දින නිර්මාංශව සිට කරඳකොළ මත පහන් තබා බෝධි පූජා තබන්න. නොයෙක් පාටවල මල්, සුවඳ දුම් වර්ග පාවිච්චි කරන්න. නැතිබැරි තරුණ ගැහැනු දරුවන්ට උපකාර කරන්න. වකුගඩු රෝගියකුට උපකාර කරන්න.
•අය 11, වැය 8, සුබ අංකය 6, සුබ වර්ණ – සුදු, ක්‍රීම්, සුබ දවස් – සිකුරාදා, සෙනසුරාදා, බදාදා
වෘශ්චික – අවිවාහකයන්ට මංගල සීනු
•ගෘහ ජීවිතය :- පසුගිය වසර තුළදී ඔබට ඉටු කර ගැනීමට අපහසු වූ සහ අතපසු වූ කරුණු කාරණා මේ වසරේදී ඉටු කර කර ගැනීමේ හැකියාව ලැබෙනු ඇත. උගත් බුද්ධිමත් සහ පූජ්‍ය පක්ෂයේ අයගේ අවවාද අනුශාසනා හිමි වෙයි. පදිංචි ස්ථානයේ දියුණුව ඇති වෙයි. නව දැනුම් සම්භාරයක් ගොඩනැඟෙන බැවින් දියුණුවට අදාළ මාර්ග සම්පාදනය කර ගනියි. අගහිඟතා ඇති නොවේ. විවාහ සහ දරුපල ආදියට ප්‍රමාද දෝෂ තිබුණේ නම් මේ වසරේදී ඒ අපේක්ෂා ඉටුකර ගැනීමේ වාසනාව ඇත.
•අධ්‍යාපනය :- විද්‍යා, වාණිජ, කලා යන සියලුම අංශවල ඉගෙනුම ලබන දරුවන්ගේ නැණ නුවණ දියුණු වෙන සහ දක්ෂතා ඔප් නැංවෙන කාලසීමාවක් බැවින් උත්සාහය, කැපවීම පෙරදැරිව කටයුතු කරන්න. විශේෂයෙන් ඉංග්‍රීසි අධ්‍යාපනයට යොමු වන දරුවන්ට ජයග්‍රහණ හිමිකර ගත හැකිය.
•රැකියාව :- රැකියා සහ ව්‍යාපාර කටයුතුවලින් පසුගිය වසරට වඩා සුබවාදී වෙනස්කම් රැසක් මේ වසරේදී ඇති වෙයි. රාජ්‍ය අංශයේ රැකියාවන්වලට වඩා ව්‍යාපාර සහ කෘෂිකාර්මික අංශවලින් ලාභ ඉපයීමේ හැකියාව ඔබට ලැබෙනු ඇත. ආත්ම විශ්වාසයෙන් යුතුව ඕනෑම කටයුත්තක නියැළීමෙන් ඔබට බොහෝ සුබපල හිමි වනු ඇත.
•සෞඛ්‍යය :- ඇස්, දත් ආදියේ සහ යටිපතුල්වල අසනීප සහ සෙම් රෝග සෑදීමට ඉඩ ඇති බැවින් සෞඛ්‍ය තත්ත්වය පිළිබඳ සැලකිලිමත් වන්න. අපල අඩු කර ගැනීමට වර්ෂයේ මුල් අඟහරුවාදා දින නිර්මාංශව උදේ හෝ සවස රතු නෙළුම් හෝ රතු මල් වර්ග ගෙන බෝධි පූජා තබන්න. කතරගම දෙවියන්ට පින් දෙන්න. ශල්‍යකර්මයකට භාජනය වූ කෙනකුට උපකාර කරන්න. ලේ දන්දීමක් කළ හැකි නම් එය ද වඩාත් සුබදායකය. බෝධි පූජා පැවැත්වීමේදී කොළොන් කොළ මත පහන් දල්වන්න. (පහන් 21ක්)
• අය 5, වැය 3, සුබ අංක 1, 2, 4, 5, 7,
සුබ වර්ණය – රතු, සුබ දවස් – ඉරිදා, අඟහරුවාදා, බ්‍රහස්පතින්දා
ධනු – අධ්‍යාපනය ලබන දරුවන්ට ජයග්‍රහණ රැසක්
•ගෘහ ජීවිතය :- පසුගිය කාලසීමාව තුළ තිබූ ඔබ තුළ තිබූ පීඩනය දුරුවී මේ වසරේදී ඔබට සහනය සැලසෙනු ඇත. ලග්නගතව ධර්ම කර්මාධිපති යෝගය පවතින බැවින් ඉතා යහපත් කල දසාවක් නිර්මාණය වනු ඇත. සිතෙහි සතුට සැනසුම, විවාහ ප්‍රමාද වූවන්ට මංගල යෝග, දරුපල මෙන්ම විදෙස් ගමන් ද සාර්ථක වේ. ආගමානුකූල දැහැමි පිළිවෙත් මත කටයුතු කිරීමෙන් ජයග්‍රහණ රාශියක් අත්කර ගත හැකිය.
•රැකියාව :- ලිපි ලේඛන ඇසුරු කරගෙන කටයුතු කරන සහ එවන් රැකියාවල නිරත අයට උසස්වීම් හිමිවනු ඇත. ඊට අමතරව ඔබ කරගෙන ගිය ඕනෑම රැකියා කටයුත්තකදී සහනදායී බවක් සැලසෙනු ඇත. විදෙස් රැකියා සඳහා ඉල්ලුම් කළ අයට ද සුබපල හිමිවනු ඇත. යුක්ති ගරුක බව ඔබ තුළ ඇති උතුම් ගුණා අංගයක් බැවින් දියුණුව සැලසී අතමිට සරු වේ.
•අධ්‍යාපනය :- ප්‍රාථමික අධ්‍යාපනයේ සිට විශ්වවිද්‍යාල අධ්‍යාපනය දක්වා සියලුම දරුවන්ට සුබදායකය. ඔවුන්ගේ නැණ නුවණ වර්ධනය, මතක ශක්තිය ගොඩනැඟීම සිදු වේ. ඔවුන්ට රටේ ප්‍රසිද්ධියට පත්වීමට අවස්ථාව ලැබෙන උසස් ප්‍රතිඵල ලැබීමේ වාසනාව ඇත.
•සෞඛ්‍යය :- උදරාබාධ, පිත් රෝග, සෙම් වැඩි, උණ රෝග පැවතිය හැකි බැවින් සෞඛ්‍ය තත්ත්වය පිළිබඳ සැලකිලිමත් වන්න. අපල අවම කර ගැනීමට වසරේ මුල්ම බ්‍රහස්පතින්දා දින නිර්මාංශව බෝධිපූජා තබන්න. කහ මල් වැඩිපුර පූජා කරන්න. බෝමළුව අමදින්න. කතරගම දෙවියන්ට පින් දෙන්න. ස්වාමීන්වහන්සේලාට ගිලන්පස පිළිගන්වන්න. ඔබගේ ගුරු මවක හෝ පියකු බැහැදැක ඔවුන් සතුටු කළ හැකි නම් එය ද ආශිර්වාදයකි.
• අය 14, වැය 7, සුබ අංක – 3, 5, 6, 8,
සුබ වර්ණය – කහ, සුබ දවස් – ඉරිදා, බදාදා,
සිකුරාදා, සෙනසුරාදා
මකර – ආතතියෙන් තොර ප්‍රීතිමත් කාලයක්
•ගෘහ ජීවිතය :- පසුගිය වසරවල ඔබට තිබූ මානසික අපහසුතා එළඹෙන්නාවූ 2023 වසර තුළ අඩු වී යයි. වසර ආරම්භයේම ලග්නාධිපති ලග්නයේ සිටිනුයේ යෝගකාරක සිකුරු සමඟය. වෙනදා නොතිබූ චිත්ත ප්‍රීතියකින් සහ සැනසීමකින් ගෙදරදොර වැඩ කටයුතුවල නිරතවීමට අවස්ථාව සැලසේ. එහෙත් රාහු තවම සිවුවැන්නේ ගෝචර වී සිටීම නිසා කලබලකාරීව සිදු කරන කටයුතුවලදී අපල උපද්‍රව සිදු විය හැකිය. ඒ ගැන සිතා තැන්පත් ලෙස කටයුතු කරන්න.
•රැකියාව :-කරන කියන රැකියා කටයුතු සිතේ සැනසීමකින් කරගෙන යා හැකි අතර, නතර වී තිබුණු ආදායම් මාර්ග යළිගොඩ නැඟේ. ධනෝපායන මාර්ග සැකසේ. විදේශ රැකියා සඳහා යොමුවීමක් ද පෙන්වයි.
අධ්‍යාපනය :- වැඩිදුර අධ්‍යාපනය සඳහා විදේශගතවීම් බලාපොරොත්තුව සිටි අයට ඒ සඳහා ලිපි ලේඛන ලැබිය හැකිය. ප්‍රාථමික අධ්‍යාපනයේ නිරත දරුවනට බාධාවකින් තොරව සිය කටයුතු කර ගැනීමට ලැබෙනු ඇත. මෙරට උසස් අධ්‍යාපනයේ නියැළෙන දරුවනට යම් යම් බාධා පැමිණිය හැකි බැවින් අවබෝධයෙන් කටයුතු කරන්න.
•සෞඛ්‍යය :- ලේ ගමන අඩු වීම, සෙම්, පිත් දෝෂ, පාදවල, ඇස්වල වේදනා මතු කරයි. අපල අවම කර ගැනීමට වසරේ මුල්ම සෙනසුරාදා නිර්මාංශ වී බෝධි පූජා තබන්න. නිල් මල් පූජා කර නුගකොළ මත පහන් දල්වන්න. නුග ගසක් මුල නිල් කිරිබතක් පිස පාත්‍රයක තබන්න. නුග වෘක්ෂයට ජලය දමන්න. කපුටන්ට කිරිබත් උයා ගිතෙල් මිශ්‍රකර තබන්න.
•අය 8, වැය 5, සුබ අංක 6, 8, 9, සුබ වර්ණය – නිල්,
සුබ දවස් – අඟහරුවාදා, බදාදා, සිකුරාදා, සෙනසුරාදා
කුම්භ – අතපසු වූ කටයුතු රැසක් ඵල දරයි
•ගෘහ ජීවිතය :- 2023 වසරේ ඔබගේ කේන්ද්‍රයේ ග්‍රහ රටාවන් අනුව පසුගිය වසරේදී ඉටුකර ගැනීමට නොහැකි වූ වැඩ කටයුතු ඉටු කරගත හැකිය. විශේෂයෙන් පදිංචි ස්ථානයේ දියුණුව උදෙසා සම්පූර්ණ කර ගැනීමට ඇති වැඩකටයුතු ඉටු කර ගැනීමේ හැකියාව ඇත. ඒරාෂ්ටක තත්ත්වයක් උදාවී තිබුණද ඔබගේ දියුණුවට අදාළ කටයුතුවල පසුබෑමක් ඇති නොවේ. ආර්ථික හා සාමාජයීය බැඳීම් ගොඩනඟාගෙන පුණ්‍ය කටයුතුවල නිරත වෙමින් ගෘහ ජීවිතය සාමයෙන් ගත කිරීමේ අවස්ථාව ඇත. විවාහ සහ දරු සම්පත් ප්‍රමාද වූ අයගේ බලාපොරොත්තු තවත් ප්‍රමාද නොවී ඉටු වන ග්‍රහබල පෙන්නුම් කරයි.
•රැකියාව:- දැනට කරගෙන යන වෘත්තීමය කටයුතුවලදී යම් යම් බාධක මතු වීමට ඉඩ ඇති අතර, ඔබේ වගකීම් නිසියාකාරව ඉටුකර ප්‍රධානීන් සමඟ ගැටුම් ඇති කර ගැනීමෙන් වැළකී සිටීම වැදගත් වේ. ඒ හැරුණු විට ස්වයං රැකියා හා ව්‍යාපාරවල දියුණුව ඇතිකර ගත හැකිය. විදෙස්ගත වීමක් බලාපොරොත්තු වන අයට ඒ සඳහා ද මේ වසරේදී ග්‍රහබල පවතී.
•අධ්‍යාපනය:- අධ්‍යාපනය ලබන දූ දරුවන්ට පොතපත හෝ තාක්ෂණික මෙවලම් මඟින් හෝ කටයුතු කරද්දී බාධා මතුවිය හැකිය. විශේෂයෙන් අමතක වීම් ප්‍රධාන වශයෙන් බලපවත්වන බැවින් බෝධි පූජාවලට යොමුවී සෙත් පැතීමෙන් එම අපල මඟහරවා ගත හැකිය.
•සෞඛ්‍යය :- ස්නායු ආබාධ, අස්ථි බිඳීම්, හෘදයාබාධ ආදියට ඉඩ ඇති බැවින් කල්පනාකාරීව කටයුතු කරන්න. අපල මගහරවා ගැනීමට වර්ෂය ආරම්භක සෙනසුරාදා දින නිර්මාංශව උදේ හෝ සවස බෝධි පූජා තබන්න. නිල් මල් පූජා කර එළඟිතෙල් පහන් නුගකොළ මත තබන්න. විෂ්ණු දෙවියන්ට පින් දී අපල දුරු කරගන්න. කපුටන්ට එළඟිතෙල් මිශ්‍ර කිරිබත් දෙන්න. බලු කපුටුදාන දෙන්න. යාචකයන්ට සහ අතපය වාරු නැති දුර්වල අයට ආහාරපාන සහ බෙහෙත්වලින් උපකාර කරන්න.
•අය 8, වැය 5, සුබ අංක 3, 8, 9, සුබ වර්ණ – රතු, නිල්, සුබ දවස් – අඟහරුවාදා, බ්‍රහස්පතින්දා, සිකුරාදා
මීන – විදෙස් රැකියා සිහින සැබෑ වෙයි
•ගෘහ ජීවිතය :- ගෘහ ජීවිතයේදී යම් යම් බාධා ඇති වුවත් ඒවා සාමකාමීව විසඳා ගැනීමට හැකියාව පවතී. බුද්ධිමත් තීන්දු තීරණ ගැනීම, වචන හුවමාරුවේදී පරෙස්සම් වීම වසර පුරාවට ඔබට ආශිර්වාදයක් වනු ඇත. ලග්න ඒරාෂ්ටක තත්ත්වයක් ආරම්භ වීම නිසා මානසික සුව සහනය අඩු විය හැකි වුවත් ඔබ කළ යුත්තේ මනස ශක්තිමත් කර ගැනීමයි. ගුරු ලග්නගතව සිටීම අනුව උත්සාහවන්තව වැඩ කිරීමෙන් ඔබට දියුණුව ළඟා කර ගැනීම පහසු වේ.
•රැකියාව :- රැකියා කටයුතු සඳහා බොහෝ ඇවිදින්නට සිදු විය හැකි අතර, විදෙස් රැකියාවලට අවතීර්ණ වීමට ද අවස්ථාව සැලසේ. ව්‍යාපාර කටයුතුවලින් ද ලාභ ලැබීමේ ප්‍රවණතාවක් ඇත. තැන්පත් ධනය අඩු විය හැකි බැවින් ණය ගැනීම්, ණය දීම් නවත්වන්න.
•අධ්‍යාපනය :- කලා ක්ෂේත්‍රයේ විෂයන්ගෙන් ඉගෙනුම ලබන දූ දරුවන්ට ජයග්‍රාහී අවස්ථා උදාවේ. ප්‍රාථමික අංශවල දරුවන්ගේ නැණ නුවණ වර්ධනය වේ. උසස් අධ්‍යාපනය ලබන දරුවන්ට විභාගවලින් ජයග්‍රහණ හිමිවේ.
•සෞඛ්‍යය :- ස්නායු දුබලතා, ඇස් සහ දත්වල ආබාධ ඇතිවිය හැකිය. වසර ආරම්භයත් සමඟ බලුකපුටු දාන දීම, යාචක, ගිලන් අයට උපකාර කිරීමෙන් අපල දුරු කර ගත හැකිය. සෙනසුරු ග්‍රහ පූජා පැවැත් වීම, විෂ්ණු දෙවියන්ට බාර වීම, නුග වෘක්ෂයට පුද පූජා තැබීම ආදියෙන් ඔබට ඇති බාධා මඟහරවා ගත හැකිය.
• අය 7, වැය 5, සුබ අංක 3, 9, සුබ වර්ණ – රතු, කහ,
සුබ දවස් – අඟහරුවාදා, බ්‍රහස්පතින්දා
ප්‍රවීණ ජ්‍යෙතිර්වේදිනී ශ්‍රියා ගනේගොඩ
Published in Health
