පුෂ්පිකා දකුණු පළාතේ පිහිටි ග්‍රාමීය රෝහලක හෙදියක ලෙස සේවය කළාය. ඕ පියකරු පෙනුමෙන් යුත් තැනැත්තියකි. දෙදරු මවක වූ පුෂ්පිකා මැදිවියේ පසුවූවාය. ඇගේ සැමියා ද රජයේ රැකියාවක් කළේය. ඇය ප්‍රතිකාර ගැනීම සඳහා රෝහලට පැමිණෙන රෝගීන්ටද කාරුණිකව සැලකුවාය. පුෂ්පිකා කාරුණික හදවතක් ඇති තැනැත්තියක් වූවාය. මේ නිසා රෝහල් කාර්ය මණ්ඩලය අතර ද පුෂ්පිකා කැපී පෙනෙන හෙදියක වූවාය.
ඇය තම සැමියා සහ දරු දෙදෙනා සමඟ පදිංචිව සිටියේ රෝහල් භුමියේ පිහිටි හෙද නිල නිවාසයේය. ඕ දිනපතා තම සේවා මුරය සඳහා රෝහලට පැමිණියේද මෙකී හෙද නිල නිවාසයේ සිටය. එක් දිනක උදෑසන ඇය තම සේවා මුරය සඳහා රෝහලට පැමිණියාය. ඇය සිය රාජකාරියේ යෙදෙන වාට්ටුවට ගොස් තම සහෝදර හෙදියන් සමඟ කතාබස් කර කිසියම් රාජකාරි කටයුත්තක් සඳහා එම වාට්ටුවෙන් පිටව ගියාය. ඇය රෝහල් කොරිඩෝව දිගෙ ගමන් කරමින් සිටියාය. අතරමගදී හමුවූ තම සහෝදර හෙදියන් සමඟ ද වචනයක් දෙකක් කතාකොට රෝහල් කොරිඩෝව දිගේ ගමන් කරමින් සිටියාය.
පුෂ්පිකාට ඉදිරියෙන් පැමිණි හෙද නිලධරයකු ඇගේ ඉදිරියෙන් නතර විය. ඇගේ ගමනට ඔහු බාධා කළේය. මෙම හෙද නිලධාරියා අතේ කුඩා සිරින්ජරයක් විය. ඔහු එම සිරින්ජරයෙන් එකවරම පුෂ්පිකාගේ උදරයට ඇන්නේය. පුෂ්පිකාට කිසිවක් සිතා ගැනීමටවත් ඉඩක් නොලැබිණි. සිරින්ජරය පුෂ්පිකාගේ උදරය පසාරු කරගෙන කිඳා බැස තිබුණේය. ඕ කෑගැසුවාය. ඇය නැඟු විලාපයෙන් රෝහල ගිඟුම් දුන්නේය. පුෂ්පිකා කඩිනමින් රෝහලේ හදිසි ප්‍රතිකාර ඒකකයට ඇතුළත් කරනු ලැබීය. ඒ වන විට ඇයට තදබල වේදනාවක් ඇති වී තිබූ අතර ඇය වේදනාව දරාගත නොහැකිව කෑගැසුවාය. මේ ආරංචිය ඒ වන විට රෝහල තුළ ළැව් ගින්නක් සේ පැතිරීගොස් තිබුණි. පුෂ්පිකා පැලඳ සිටි සුදු පැහැති නිල ඇඳුමේ සිරින්ජරයෙන් අනිනු ලැබු ස්ථානය අවට කොළ පැහැති පැල්ලමක් තිබුණේය.
පුෂ්පිකාට අනිනු ලැබු සිරින්ජරය ඇතුළත කොළ පැහැති ද්‍රාවණයක් විය. වෛද්‍යවරු විසින් එම ද්‍රාවණය පරීක්ෂා කළ අතර එහි ඇත්තේ පැරකොට් වස බව වෛද්‍යවරුන් විසින් අනාවරණය කරගනු ලැබීය. ඒ වන විට පුෂ්පිකාට සිරින්ජරයෙන් අනිනු ලැබු හෙද නිලධරයාද රෝහල් සේවකයින් විසින් අල්ලා පොලිසියට බාර දුන්නේය. මේ වන විටත් පුෂ්පිකාගේ සිරුරට එන්නත් කරනු ලැබූ පැරකොට් වස ඇගේ සිරුරට ඇතුළු වී තිබුණි. සිරින්ජරයේ වපසරිය මිලි ලීටර් දහයක් පමණ විය. සිරින්ජරයකින් පැරකොට් වස පුෂ්පිකාගේ සිරුරට එන්නත් කොට තිබූ නිසා ශරීරගත වූ වස ක්‍රියාත්මක වෙමින් තිබුණේ ඉතා සෙමිනි. පුෂ්පිකාගේ සිරුර කහ පැහැවී තිබුණි. දැඩි අසාධ්‍ය තත්ත්වයෙන් පසු වූ පුෂ්පිකා වෙනත් මහ රෝහලකට මාරුකොට යවා තිබූ අතර ඇගේ දිවි බේරා ගැනීම සඳහා වෛද්‍යවරු දැඩි සටනක නිරත වෙමින් සිටියහ. දින දොළහකට පමණ පසු පුෂ්පිකා මිය ගියාය. ඇය මියයාමට පෙර ඇගේ රුධිරය සහ මුත්‍රා සාම්පල් පරීක්ෂණ කටයුතු සඳහා රජයේ රස පරීක්ෂකවරයා වෙත යොමු කොට තිබුණේය. කෙනකු ජීවතුන් අතර සිටියදී ඔහුගේ මුත්‍රා සහ රුධිර සාම්පල් රස පරීක්ෂකවරයා වෙත යොමු කොට රස පරීක්ෂණ වාර්තා ගෙන්වා ගැනීම ඉතාමත් කලාතුරකින් සිදු වන දෙයකි. සැබැවින්ම මෙය විශේෂිත අවස්ථාවකි.
‘පැරකොට්’ වස ශරීරගත වී ඇති බව රස පරීක්ෂක වාර්තාවේ සඳහන් විය. පැරකොට් උග්‍ර විෂ සහිත වල් නාශකයකි. පැරකොට් සක්‍රිය තත්ත්වයට පත් වන්නේ වල් පැළෑටි සහිත පරිසරයකදී පමණි. පැරකොට් සහිත සිරින්ජරයක් රෝහල තුළ තිබීමද බරපතළ ගැටලුවකි. පැරකොට් මිලිලීටර් පහක පමණ තේ හැන්දක් යම්කිසි අයකුගේ ශරිරගත වුවහොත් එම තැනැත්තා මරණයට පත් විය හැකිය. මියගිය පුෂ්පිකාගේ පශ්චාත් මරණ පරීක්ෂණය සිදු කරනු ලැබුවේ විශේෂඥ අධිකරණ වෛද්‍ය නිලධාරි යූ.සී.පී.පෙරේරා විසිනි.
“වස ශරීර ගත වීම නිසා මියගිය මෙම හෙදි නිලධාරිණීයගේ සිරුර පුරා සෙමෙන් තමයි වස ක්‍රියාත්මක වෙමින් තිබුණේ. ඒ නිසා තමයි ඇය දින 12කට පමණ පසු මියගියේ” විශේෂඥ අධිකරණ වෛද්‍ය නිලධාරිවරයා කීවේය. බෝහෝ වස විෂ, ඖෂධ වැනි රසායනික සංයෝග ශරීරගත වූ විට එය සිරුර තුළදී වෙනත් සංයෝග බවට පත්වේ. ඒවා හඳුනා ගැනීම සඳහා රස පරීක්ෂක දෙපාර්තමේන්තුව මඟින් පරීක්ෂණ පවත්වනු ලැබේ. සැක සහිත මරණවලදී මෙවැනි පරීක්ෂණ පවත්වන අතර ලබාගත් රුධිර සහ මුත්‍රා සාම්පල් වැඩිදුර පරීක්ෂණ සඳහා රජයේ රස පරීක්ෂක වෙත යොමු කරනු ලබන්නේ අධිකරණ වෛද්‍යවරයාගේ උපදෙස් මතය. එහෙත් පුෂ්පිකාගේ මරණය සම්බන්ධයෙන් කිසිම සැක සහිත තත්ත්වයක් ඇතිවි නොතිබුණි. පැරකොට් නමැති වල් නාශකය ශරීරගත වීමෙන් ඇය මියගොස් තිබිණි. මේ නිසා අධිකරණ වෛද්‍යවරයාට පැවැත්වීමට සිදු වූයේ පශ්චාත් මරණ පරීක්ෂණයටත් එහා ගිය සායනික මරණ පරීක්ෂණයකි.
සාමාන්‍යයෙන් කෙනකු මරණයට පත් වන්නේ වස පානය කොට දිවි හානි කර ගැනීමෙනි. කෙනකුට තවත් අයකු විසින් වස දී හෝ බලහත්කාරයෙන් වස පොවා මරණයට පත් කළ අවස්ථාද නැත්තේ නොවේ. එහෙත් තවත් අයෙකු විසින් මනුෂ්‍ය ඝාතනයක් කිරීම සඳහා පැරකොට් වස යොදා ගැනීම ඉතා සුවිශේෂී වූ අවස්ථාවකි. ඒ නිසා පශ්චාත් මරණ පරීක්ෂණයද සුවිශේෂී එකක් විය.
“වස සිරින්ජරයක දමා තවත් අයකුට එන්නත් කිරීම බරපතළ මනුෂ්‍ය ඝාතන තැතක්. ඉතාමත් කලාතුරකින් මෙවැනි සිද්ධින් වාර්තා වන්නේ” ඒ අධිකරණ වෛද්‍ය නිලධාරි යූ.සී.පී. පෙරේරාගේ අදහසයි. හෙද නිලධාරිණීය මරණයට පත් කිරීම සඳහා සැලසුම්සහගත ලෙස සිරින්ජරයකට වස දමා එන්නත් කිරීම මනුෂ්‍ය ඝාතනයකි. මේ නිසා සැකකරුට එරෙහිව අධිකරණයේ දී මිනීමැරම් චෝදනා ඔප්පු කිරීම සඳහා අධිකරණ වෛද්‍යවරයා විසින් දෙන පශ්චාත් මරණ පරීක්ෂණ වාර්තාව ඉතා වැදගත් වන්නේය. එමෙන්ම මියගිය හෙද නිලධාරිනිය විසින් රෝහලේ ප්‍රතිකාර ලබමින් සිටියදී තමන්ට සහෝදර හෙද නිලධාරියකු විසින් සිරින්ජරයකින් උදරයට අනිනු ලැබු බවත් ඒ තුළ කොළ පැහැති ද්‍රාවණයක් තිබූ බවත් ප්‍රකාශ කොට තිබුණි. ලංකාවේ සාක්ෂි ආඥා පනතේ 32 (1) වගන්තිය යටතේ මියගිය තැනැත්තිය විසින් කරනු ලැබූ මෙම මරණාසන්න ප්‍රකාශය ඉතා වැදගත් සාක්ෂියකි. ඒ විතරක් නොව යම්කිසි අයෙකු විසින් මරණාසන්න අවස්ථාවේදී ලිඛිතව හෝ වාචිකව ලබා දෙන මෙම සාක්ෂිය අධිකරණයේදී නොබිඳිය හැකි සාක්ෂියකි.
වස ශරීරගත වූ විට පෙණහලුවල පටකයේ ස්වභාවය වෙනස් වී එය කෙඳි සහිත තත්ත්වයට පත්වේ. ශ්වසනයේ ක්‍රියාකාරීත්වය අඩපණ වේ. එමෙන්ම අක්මාවේ සහ වකුගඩුවල ක්‍රියාකාරීත්වයද අඩපණ වේ. අවසානයේ එය පෙණහලුවලට බලපෑමෙන් මරණයට පත් වේ. ඒ විතරක් නොව තුවාලවලින් පවා පැරකොට් වැනි වස ශරීරගත වීමෙන් කෙනකු දින ගණනාවකට පසු මරණයට පත්විය හැක. හෙද නිලධාරිනියගේ සිරුර තුළ වස ශරීරගත වීම නිසා පෙනහලු, වකුගඩු, අක්මාව වැනි අවයවයන්වලට හානි වී තිබූ අතර, එය පටකවේදී පරීක්ෂණයේ දී අනාවරණය විය. හෙදි නිලධාරිනියගේ උදරයේ දකුණු ප්‍රදේශයේ සිරින්ජරය මතින් අනිනු ලැබූ ස්ථානයේ සිදුරු වී තුවාලයක් ඇති වී තිබුණි. එම තුවාලය වටේද පැරකොට් විහිදී ගොස් තිබුණි.
“හෙද නිලධාරිනිය සහ හෙද නිලධාරියා අතර හෙද නේවාසිකාගාරය සම්බන්ධයෙන් ප්‍රශ්නයක් ඇතිවෙලා තියෙනවා. ඒ ප්‍රශ්නය දුරදිග ගොස් තමයි හෙද නිලධාරියා විසින් හෙද නිලධාරිනියට පැරකොට් වස සිරින්ජරයකට දමා ඇනලා තියෙන්නේ” අධිකරණ වෛද්‍යවරයා කීවේය.
දියුණු රටවලනම් වස ශරීරගත වූ විට එවැනි පුද්ගලයින්ට පෙනහලු බද්ධ කිරීම පවා සිදු කරති. වස විෂ, ඖෂධ වැනි රසායන සංයෝග ශරීරගත වූ විට ශරීරය තුළදී ඒවා වෙනත් සංයෝග බවට පත්වේ. එම සංයෝග හඳුනා ගැනීමට පරීක්ෂණ සිදු කරනු ලබන්නේ දියුණු තාක්ෂණික උපකරණ යොදා ගනිමිනි. වස ශරීරගත වූ බව ඔප්පු කළ හැක්කේ එම පරීක්ෂණ ක්‍රම මඟිනි.
කරාපිටිය වෛද්‍ය පිඨයේ අධිකරණ වෛද්‍ය අංශයේ මහාචාර්ය විශේෂඥ අධිකරණ වෛද්‍ය නිලධාරි යූ.සී.පී.පෙරේරාගේ අත්දැකීම් ඇසුරෙනි.
Published in Health
