පාරිභෝගික කටයුතු පිළිබඳ අධිකාරිය විසින් එහි නිලධාරීන්ට කොළඹදී පවත්වන වැඩමුළුවකට මෙරට ප්‍රධාන පෙළේ ආපන ශාලාවකින් ඇණවුම් කර තිබූ දිවා ආහාරයේ පණුවන් සහ ප්ලාස්ටික් කැබිලි තිබීමේ සිද්ධියක් සම්බන්ධයෙන් නඩු පැවරීමට කොළඹ මහ නගර සභාව පියවර ගෙන ඇති බව එම අධිකාරියේ සභාපති නීතිඥ ශාන්ත නිරිඇල්ල පැවසීය.
කොළඹ යුනියන් පෙදෙසේ පිහිටි ආපන ශාලාවෙන් මෙම ඇණවුම කර ඇති අතර ඇතැම් කෑම පාර්සල්වල පොලිතින් කැබලිද තිබූ බවද සභාපතිවරයා සඳහන් කළේය.
එම අධිකාරියේ නිලධාරීන්ට පෙරේදා (05) සහ ඊයේ (06) දෙදින වැඩමුළුවක් කොළඹදී පැවති අතර එහි දිවා ආහාරය සඳහා මෙම ආපන ශාලාවෙන් බත් පාර්සල් 150ක් පමණ ඇණවුම් කර තිබුණි.
එලෙස ඇණවුම් කළ කෑම පාර්සල් තුනක පණුවන්, ප්ලාස්ටික් කැබලි සහ පොලිතින් තිබීම හේතුවෙන් වැඩමුළුවට සහභාගී වූ නිලධාරීන් වහාම කොළඹ මහ නගර සභාවේ සෞඛ්‍ය වෛද්‍ය නිලධාරී කාර්යාලයට පැමිණිලි කළ බවද සභාපතිවරයා සඳහන් කළේය.
අනතුරුව එම ස්ථානයට කොළඹ මහ නගර සභාවට අනුයුක්තව සිටින මහජන සෞඛ්‍ය පරීක්ෂකවරුන් පැමිණ පරික්ෂා කර සිද්ධිය තහවුරු කර ගැනීමෙන් පසු මහජන සෞඛ්‍ය පරීක්ෂකවරුන් අදාළ ආපන ශාලාවටද ගොස් පරික්ෂා කර තිබේ.
එලෙස පරික්ෂා කිරීමෙන් අනතුරුව එම ආපනශාලාවට එරෙහිව නඩු පැවරීමට පියවර ගෙන තිබේ.
-Aruna
