දැනට ත්රස්ත මර්නද පනත යටතේ අත්අඩංගුවට ගෙන රඳවාගෙන ප්රශ්නකරන අන්තර් විශ්වවිද්යාලයීය ශිෂ්ය බලමණ්ඩලයේ කැඳවුම්කරු වසන්ත මුදලිගේ හමුවීමට ගොස් ඇති ඔහුගේ සොහොයුරු අනුර මුදලිගේ සිය ෆේස්බුක් ගිණුමේ සටහනක් තබා ඇත.
ඊයේ (04) තැබූ එම සටහනින් කියැවෙන්නේ තමන් යහපත් සෞඛ්ය තත්ත්වයෙන් සිටින බවත්, එල්ලවන පීඩාවන් හමුවේ මානසිකව නොවැටී සිටින බවත් හිතවතුන්ට පවසන ලෙස සිය සොයුරා කී බවයි.
බැසිල් රාජපක්ෂගේ මල්වානෙ නිවස ඇතුළු ස්ථාන කීපයකට දෑස් බැඳ රැගෙන ගොස් ඇති ආකාරය සම්බන්ධව වසන්ත මුදලිගේ සිය සොයුරාට ප්රකාශ කර තිබේ.
වසන්තගේ සොයුරැ අනුර සිය ෆේස්බුක් ගිණුමේ තැබූ සටහනේ මෙසේ සඳහන්ව තිබේ.
කැඳවුම්කරු වසන්ත මුදලිගේ බැසිල්ගේ මල්වානේ පිහිටි නිවසට ගෙනිහින් කියන බරපතළ තත්ත්වය පිළිබඳ වර්තමාන තත්ත්වය සියලු දෙනාට දැනගැනීම සඳහා තබන සටහනකි.
මම ඊයේ දිනයේදී (2022.10.03) තංගල්ල පැරණි නාවික හමුදා කඳවුර තුළ දී අයියව බලන්න ගියා. අයියා යහපත් සෞඛ්ය තත්ත්වයෙන් ඉන්නවා කියලා හැමෝටම කියන්න කිව්වා. ඒ වගේම මානසිකව වැටිලා නෑ. වට්ටන්න තවදුරටත් ආණ්ඩුව විවිධ මැදිහත්වීම් අඛණ්ඩව කරමින් සිටින බවත් පැවසුවා.
මල්වානේ සිද්ධිය සම්බන්ධව නිශ්චිත පිළිතුරක් අයියා ලබාදුන්නා. ඒ තමා අත්අඩංගුවට ගත් මුල් සතිය තුළ රාත්රී කාලවල මල්වාන බැසිල්ට අයත් යැයි පවසන ඉඩමට රැගෙන ගොස් තිබෙන බව.
තවත් නවගමුවේ ස්ථානයකටත්, කඩවත ප්රදේශයේ ස්ථානයකට හා ගම්පහ ප්රදේශයේ ස්ථානයකට වශයෙන් ස්ථාන කිහිපයකටත් මුහුණ වසා ඉතා රහසිගතව රැගෙන ගොස් ප්රශ්න කර තිබේ යැයි සඳහන් කළා.
කලකට පෙර සිදු වූවක් වුවත් ගිනිගත් නිවස හෝ වෙන යම් ස්ථානවලට වසන්ත රැගෙන ගොස් බාහිරෙන් සාක්ෂි ඔබ්බවා ඉතා උපක්රමශීලීව අධිකරණය තුළ දී ඒවා ජනතාව වෙනුවෙන් අරගල කළ ශිෂ්ය නායකයන්ට විරුද්ධව භාවිතා කිරීමට දරන උත්සාහයක් බව ඉතා පැහැදිලිය.
lankasara.
