අධ්‍යාපන රාජ්‍ය අමාත්‍ය සුසිල් ප්‍රේමජයන්ත් මහතා වහාම ක්‍රියාත්මක වන පරිදි එම ධුරයෙන් ඉවත් කර තිබේ.
ජනාධිපති ගෝඨාභය රාජපක්ෂ මහතා තම බලතල අනුව මෙම ඉවත් කිරීම සිදුකරන ලද බව ජනාධිපති මාධ්‍ය අංශය නිවේදනය කරයි.
ආණ්ඩුව අභ්‍යන්තරයේ සිට ආණ්ඩුවේ ක්‍රියාමාර්ග විවේචනය කරන රාජ්‍ය අමාත්‍ය සුසිල් ප්‍රේමජයන්ත මහතා වැනි පුද්ගලයින් ඕනෑම අවස්ථාවකදී අමාත්‍ය ධුරවලින් ඉවත් කිරීමට තමාට ඕනෑම අවස්ථාවක බලය ඇතැයි ජනාධිපති ගෝඨාබය රාජපක්ෂ මහතා ඊයේ (03) පැවති කැබිනට් මණ්ඩල රැස්වීමේදි දැඩි ආවේගයෙන් යුතුව ප්‍රකාශ කර ඇතැයි වාර්තා වේ.
කැබිනට් මණ්ඩල රැස්වීම ආරම්භයේදී අංක 49 කැබිනට් පත්‍රිකාව අතට ගත් ජනාධිපතිවරයා රජය විසින් ලබාදීමට නියමිත විශේෂ සහන මල්ල ඇතුලත් මුදල් ඇමැතිවරයාගේ කැබිනට් පත්‍රිකාව කියවා තිබිණ.
ඉන්පසුව ඇමැතිවරුන් ඇමතූ ජනාධිපතිවරයා පවසා ඇත්තේ, ඉතාම අසීරු තත්ත්වයකදී වූවද ජනතාව සඳහා මෙවැනි සහන මල්ලක් දීමට රජය විසින් තීන්දු කර ඇති අවස්ථාවකදී ඒ පිළිබද ජනතාව තුළ මතයක් හදනවා වෙනුවට ආණ්ඩුවේ ඇතුලේ සිට ආණ්ඩුවම විවේචනය කිරීම විපක්ෂයට වාසිදායක වී ඇති බවයි.
සුසිල් ප්‍රේමජයන්ත රාජ්‍ය අමාත්‍යවරයා විසින් පසුගියදා සිදුකර තිබු ආණ්ඩු විරෝධී විවේචනය පිලිබදවද මෙහිදී ජනාධිපතිවරයාගේ දැඩි ලෙස අප්‍රසාදය පළ කර තිබිණ.
ආහාර අර්බුදයට අදාල විෂයභාර ඇමැතිවරුන් සහ ප්‍රතිපත්තිමය තීන්දු ගත් පුද්ගලයන් වගකිව යුතු බවටත්, රටේ මුහුණදී සිටින බරපතල අර්බුදයන්ට විසඳුම් දිය හැකි කාලය ඉක්මවා ගොස් ඇති බවත් දැන් මේවාට විසඳුම් දිය හැක්කේ වෙනත් කණ්ඩායමකට බවටත් රාජ්‍ය අමාත්‍ය සුසිල් ප්‍රේමජයන්ත මහතා පසුගියදා අවධාරණය කර සිටියේය.
බඩු මිල වැඩි වීමට වෙළෙඳ ඇමැති කෘෂිකර්ම ඇමැති, ආහාර ඇමැති වගකිවයුතු බව පැවසූ ප්‍රේමජයන්ත, කෘෂිකර්ම ඇමැති සම්පූර්ණයෙන්ම “ෆේල්” බවද ප්‍රකාශ කළේය.
රාජ්‍ය අමාත්‍ය සුසිල් ප්‍රේම ජයන්ත මහතා විසින් සිදුකළ එම ප්‍රකාශයන් සම්බන්ධයෙන් බන්දුල ගුණවර්ධන හා මහින්දාන්නද අලුත්ගමගේ යන අමාත්‍යවරුන් දෙදෙනා ජනාධිපතිවරයාට පැමිණිලි කර තිබී ඇත.
